Tema: “Die magtige Thor sonder sy hamer.”

Joseph Campbell het eens gesê dat mitologie eintlik sielkunde is, maar misverstaan word as biografie, geskiedenis of kosmologie.

Thor was ’n gerespekteerde figuur van die Viking-panteon in die Noorse mitologie. Hy was ’n magtige vegter met kolossale krag, met sy hamer as ’n simbool daarvan. Hy het deur die kosmos gewandel en reuse en trolle beveg en oorwin. In een mite word sy hamer gesteel en hy moes deur interessante ervarings gaan om dit weer terug te kry. In ’n ander verhaal besef hy weereens deur bewusmakende belewenisse dat krag en mag perke het.

Hierdie legendes dui op die konstruktiewe gebruik van mag as ’n balans tussen selfgelding en nederigheid, dapperheid en beskeidenheid, beheer en oorgawe. Hierdie antieke mites is veral relevant in vandag se wêreld met die misbruik van mag, die voorkoms van geslagsgebaseerde, en ander vorme van geweld, en het implikasies vir tendense in die samelewing asook vir individue in die soeke na ’n eietydse identiteit en geestesgesondheid.

YouTube video: youtube.com/watch?v=Z8ZROjmG7Z4

Tema: Deurboorde klippe van die Boesmans: Meer as net klippe met gate?

Ons almal ken hulle, tel hulle in die veld op, of gebruik hulle as deurstoppe – daardie ronde klippe met hulle mensgemaakte gate. Gewoonlik word hulle gesien as graafstokgewigte vir uintjies uitgrawe, maar die feit dat hulle in Steentydperkgrafte gevind word, dui daarop dat hulle ook ander betekenisse gehad het.

In een só ‘n graf, is byvoorbeeld ‘n reeks visgrate binne-in ‘n deurboorde klip se gat gevind. Die oudste klippe is te klein en lig om as graafstokgewigte gebruik te word. Hierdie oudste klippe het ook kerwe rondom hulle gate wat ‘n simboliese betekenis kon gehad het. Etno-historiese vertellings dui daarop dat Boesmanvroue van die Noord-Kaap deurboorde klippe gebruik het om met Grootjiegeeste te kommunikeer.

Sommige Bantoesprekende landbouers gebruik vandag nog die klippe in reënmaak- en ander rituele. Ek ondersoek die waarkynlikheid dat die gate sjamaniese vortex-ervarings (en moontlik ook naby-dood ervarings) versinnebeeld. Sulke neurochemiese ervarings is moontlik die oerwortels van menslike spirituele of religieuse gewaarwording – miskien reeds teen meer as 40 000 jaar gelede in Suider-Afrika. 

Youtube video: youtu.be/36b3HGWzbvA

Praatjie deur Jan Horn

Titel: Die Paaie Sonder Teer

‘n Informele praatjie oor die  die kere waar my lewenspad by ‘n vurk gekom het en ek ‘n besluit moes maak. Besluite wat my lewe se koers bepaal het. Ek het onlangs ‘n bestek geneem oor die hoof besluite om agter te kom of daar ‘n patroon is. En daar is. Ek noem dit Die Paaie sonder Teer — ook die titel van die boek waaraan ek nou werk.

Na die praatjie gaan ons gesellig saam kuier.

Hierdie byeenkoms gaan in Centurion by Eldoraigne se Tennisklub wees.

Tema: “Julianus, die laaste heidense Romeinse keiser.”

Frederik van Dyk is ‘n prokureur van Johannesburg en ‘n stigtings-redakteur van OntLaer. Hy sal ons toespreek oor Julianus die Geloofsversaker, oftewel “Julian the Apostate”. Hy doen dit na aanleiding van ‘n onlangse boek deur Philip Freeman, “Julian: Rome’s Last Pagan Emperor”.

Julianus was die Romeinse troonopvolger (caesar) van 355 tot 360 n.C. en keiser van 361 tot 363 n.C. Sy bewind is gekenmerk deur militêre veldtogte teen Germaanse invallers, sowel as teen die Persiese Ryk.  Hy was ‘n gerekende Neoplatoniese filosoof en was gekant teen die groeiende invloed van die Christendom. Sy pogings om die antieke heidense tradisies te laat herleef, het ‘n kultuuroorlog dwarsoor die Romeinse Ryk ontketen. Vir hom was hierdie kultuuroorlog een van idees, filosofiese kritiek en die geskrewe woord. Dit het gewoed tussen die ontluikende idees van die Christendom en die klassieke etiek en metafisika, soos vanuit veral die Neoplatoniese filosofie beskou. Die uitkoms hiervan was grootliks bepalend vir hoe ons die Westerse wêreld vandag ken en verstaan.

YouTube video: youtu.be/7rSaRBxLE2Y

Hierdie byeenkoms gaan in Centurion by Eldoraigne se Tennisklub wees.

Prof. Pieter Botha gaan oor die Duitse filosoof Hannah Arendt praat en die titel is:

“Om donker tye met moed en onafhanklike denke tegemoet te gaan” – ’n Ontmoeting met Hannah Arendt.

Wat kan Hannah Arendt ons vandag leer? In sommige opsigte is dit ’n bisarre vraag, want sy haarself sou dit nie goedkeur nie. Hannah Arendt was ’n vurige verdediger van vrye denke. Sy het haar eie tye oordink en deurdink. Mens kan nooit sê dat “hierdie oomblik” van die geskiedenis die groot hoogtepunt is van ’n (mý) narratief wat “daar” begin het nie. Daarom moet mens vir jouself dink om die werklikheid waarin jy jouself bevind, te beskryf, te interpreteer, te begryp, sodat jy dit dan kan weerstaan.

Daar is drie aspekte, dink ek, waarmee Hannah Arendt ons vandag kan help.

1. Totalitêre denke word gekenmerk met die oordeel dat daar oorbodige mense is. Sodra jy besluit het dat sommige mense se lewens nie belangrik, of nie so waardevol soos ander is nie, loop jy die pad van totalitêre denke.
2. Die belangrikheid van vrye denke, van selfdenke. En vir ons beteken dit om ruimtes te skep waarin vrye denke moontlik is. Onderwys, kultuur, instellings wat vrye denke beskerm.
3. Respek, betrokkenheid en deernis (Hannah Arendt gebruik die woord “liefhê”) vir ons wêreld.

Sy was ’n vurige mens wat geskryf en gedink het, nie net om die wêreld ’n beter plek te maak nie, maar ook om ons te leer hoe om dit lief te hê vir wat dit is.

Midstream Byeenkoms

Tema: “Calvyn en Servetus: Twee Hervormers – een Brandstapel.”

In 1534 word ʼn debat tussen twee voortvlugtende jongmans in Parys gereël, maar een van hulle daag nie op nie. Twaalf jaar later was daar ʼn briewewisseling tussen hulle wat etlike maande geduur het. Byna 20 jaar na die debat wat nooit plaasgevind het nie, argumenteer hulle oor geloofsake in die hof in Genéve. 

As mens ʼn hervormer beskou as iemand wat in die 16e eeu gepoog het om die gebruike van die Rooms Katolieke Kerk te verander, was beide Michael Servetus en Johannes Calvyn hervormers. Een was ʼn voorstander van owerheidsreformasie en die ander een van radikale godsdienstige reformasie.

Titel: “Ook jy kan gelukkiger wees.” 

Ons almal verlang na geluk, maar in ’n wêreld wat vinnig verander, het ons meer as geluk nodig. Ons het wysheid nodig — die vermoë om betekenis te vind, waarheid te onderskei en doelbewus te leef.

Tegnologie en kunsmatige intelligensie verander hoe ons dink, kommunikeer en met mekaar omgaan. Hoe bly ons menslik, onderskei ons wat werklik belangrik is en ontwikkel ons die wysheid om nie net slimmer nie, maar ook meer betekenisvol en gelukkiger te leef?

Die toekoms vra daarom nie bloot meer intelligensie nie, maar ’n herontdekking van die kuns van menswees: om betekenis te vind, waarheid te soek en saam met ander ’n sinvolle lewe te lei.

‘n Video van die lesing is op YouTube beskikbaar: www.youtube.com/watch?v=5kfowG6BKYE

Die byeenkoms word gehou in die Lantern-restaurant by Retire @ Midstream.

Dr Leon Stander gaan met ons gesels oor “Die Herontdekking van Xenophon van Athene – Soldaat, Filosoof en Skrywer”. 

Xenophon van Athene (ca. 430-354 v.C.) was ‘n Griekse soldaat, filosoof, geskiedkundige en skrywer.  Hy was ‘n student van Sokrates en tydgenoot van Plato en Aristoteles.  Sy bekendste geskrif was die Anabasis van Kores. Dit is die verhaal van die aftog van die beroemde Tienduisend uit Persië ná die slag van Cunaxa in 401 v.C. Die Opvoeding van Kores en Herinneringe aan Sokrates is twee van sy ander bekende geskrifte.

In hierdie praatjie vertel Leon Stander die interessante verhaal van Xenophon en ondersoek hy Xenophon se konteks en nalatingskap.  Hy bekyk Xenophon se invloed op figure so uiteenlopend soos Alexander die Grote, die Romeinse Stoïsyne, Scipio Africanus, Julius Caesar, Machiavelli, Thomas Jefferson en Jan Smuts.  Voorts toon hy aan hoe Xenophon in die tyd van Trump, Putin, Netanyahu en Erdogan steeds relevant is.

Tema: “Voëls en musiek”

Voëlgeluide strek deur ʼn hele spektrum van geraas aan die een kant tot musikale melodieë aan die ander kant.  Ons gaan na ʼn paar klankgrepe luister van plaaslike voëls, en ek gaan aantoon hoe dat mens dié voëlsang kan opteken met ons musieknotasie op ʼn notebalk.  Die sangvoëls gebruik dieselfde toonleer wat mense gebruik.  Daarna gaan ons luister na klankgrepe uit klassieke komposisies waarin die komponiste op allerhande interessante wyses voëlgeluide in die musiek ingebring het.

Van geraas tot melodie – voëlgeluide strek oor ’n wye spektrum. In hierdie interessante lesing luister ons na die sang van ’n paar plaaslike voëls en ontdek ons hoe dié sang met gewone musieknotasie op ’n notebalk weergegee kan word. Sangvoëls gebruik immers dieselfde toonleer as mense.

Ons luister ook na uittreksels uit klassieke komposisies waarin komponiste voëlgeluide op allerlei interessante wyses in hulle musiek verwerk het.

Tema: Charles Darwin se onthutsende insig: niks op aarde bly ooit dieselfde nie –  selfs nie eens godsdienste nie.

Nikolas Kopernikus, Galileo Galilei en Charles Darwin het deur hulle navorsing en publikasies Westerlinge se begrip van die heelal, die aarde en lewe op aarde radikaal verander. Ons dink vandag totaal anders oor die heelal, die aarde en lewe op aarde as die skrywers van die Bybelboeke en die teoloë wat vir die Christelike leerstellings en belydenisse verantwoordelik was. Daar word nie verniet van die Kopernikaanse en die Darwiniaanse revolusies gepraat nie.

Die lesing vertel een en ander oor hierdie revolusies voordat die fokus verskuif na die impak daarvan op ons denke oor godsdiens in die algemeen. Hoekom het godsdiens ontstaan en waarom duur dit voort? Daarna verskuif die fokus na drie godsdienste waarvan ons in die Bybel lees, dis nou te sê as ons bereid is om ook tussen die lyne te lees en kennis te neem van die moderne navorsing oor die Bybel, die Judaïsme en die Christelike godsdiens.

Hoe gemaak met godsdienstige feesdae?

As jy ontnugter raak in geloof, is religieuse feesdae skielik ’n hengse probleem. Ons voel nie meer dieselfde oor dae soos Pase of Kersdag nie. Jy is nie ’n kerkganger nie. Jy sien dalk nie meer jouself as religieus nie. Jy sê dalk in die openbaar jy is nie ’n Christen nie. Maar by ons in die Herfs of verder Noord in hulle Lente, is daar ’n Sondag wat Christene tradisioneel Jesus se opstanding vier. En jy word soms by religieuse feestelikheid betrek. Dalk wil jou gesin die Goeie Vrydag diens of die Kersdiens bywoon. Dalk kom die familie by­me­kaar. Maar as jy in godsdiens ontnugter raak, is die soort feeste vir jou ’n bederf. Een benadering is die ontken-patroon, om te ontken dat sulke dae waarde het. Maar as jy sulke dae uit jou lewe sny, word jy ’n buitestander buite jou familie en geliefdes se feestelikheid. Dit kan persepsies vorm van jouself as ’n suurknol of pretbederwer, en by geliefdes negatiewe persepsies en herinneringe van nie-geloof vorm. Ons het ’n ander benadering nodig.

 YouTube video: www.youtube.com/watch?v=ToXOdTGR_Bk

Don Cupitt: ’n Profeet Sonder Eer

My persoonlike ervaring van kerklike leiers is dat hulle oor die algemeen onverdraagsaam is. Daar is ‘n sterk fokus op die verlede in plaas van die toekoms. Hulle is gewoonlik ingeteeld in hulle denke, en wantrouig teenoor intellektualisme. As gevolg hiervan was Don Cupitt binne die kerk ’n profeet sonder eer.

Hierdie Cambridge godsdiensfilosoof en eertydse Anglikaanse priester, is op 18 Januarie 2025 in die ouderdom van negentig jaar oorlede. In sy publikasies redeneer hy dat die Christendom ’n ernstige intellektuele krisis beleef. Bonatuurlike wesens soos God en engele, asook plekke soos die hemel en die hel, en idees soos ’n lewe na die dood, bestaan nie werklik nie. Hierdie begrippe behoort eerder as simbole en metafore verstaan te word. God is ’n oorkoepelende metafoor vir dit wat mooi en goed is. As sulks kan dit mense help om sin te gee aan hulle lewens.

’n Spiritualiteit gekenmerk deur mededeelsaamheid, verdraagsaamheid, aanvaarding, en gasvryheid sonder om ’n hiernamaalse beloning te verwag, is eg. Cupitt moedig ons aan om die lewe hier-en-nou te omhels, outentiek te leef, en oomblik vir oomblik die prag en wonder van die lewe te vier.

 Uitdeelstuk:

1. Godsbeskouing

“I continue to speak of God and to pray to God. God is the mythical embodiment of all that one is concerned with in the spiritual life. God is the religious demand and ideal, the pearl of great price and the enshriner of values. He is needed – but as a myth.” (Taking Leave of God)

“The more God is absolutised, the more we are presented with the possibility of living under the dominion of a cosmic tyrant who will allow nothing, and least of all religion, to change and develop…” (Taking Leave of God)

2. Jesusbeskouing

“Jesus het gesê: ‘Indien julle leiers sê: kyk, die Koninkryk is in die hemel, dan sal die voëls van die hemel julle vóór wees; indien hulle vir julle sê: kyk, dit is in die see, dan sal die visse julle vóór wees. Nee. Die Koninkryk is in julle binneste en julle buitenste.’”(Evangelie van Thomas, logion 3)

3. Godsdiensbeskouing

It is “… about equipping people for life in a state society by teaching them how to sublimate raw biological impulses into socially-preferable cool and universal dispositions—for example when we reason people into converting the impulse to seek sudden and violent revenge into the cool passion for universal justice; or when we learn to sublimate anxiety into vigilance in caring for and maintaining social institutions of every kind.” [The Way to Happiness, 2003:77].

4. Alledaagse Taalgebruik
5. Carpe Diem.
6. Ons het net een lewe (YOLO).
7. Leef en laat leef.
8. Dit is wat dit is.
9. Elke donker wolk het ʼn silwer randjie.
10. Maak die beste van ʼn slegte saak.
11. Die dag toe hy met my getroud is, het hy sy hande Kanaän belowe.
12. Vandat sy met my getroud is, het sy hemel op aarde.
13. Ek hoop en bid jy is reg.
14. Sy offer haar lewe op vir haar gesin.

YouTube video: www.youtube.com/watch?v=TsIrE-L7kKY

Lesing in PDF-formaat

Prof. Marlize Lombard – Universiteit van Johannesburg

Middel Steentydperk-boogjag en die vorming van die Homo sapiens brein

Hierdie praatjie is ‘n reis na die diep verlede van die menslike brein in Suid Afrika. Vandag verander tegnologie soos selfone, rekenaars, rekenaarspeletjies en sosiale media ons gedrag, asook ons breinstrukture en konneksies. Daar is geen rede om te dink dat dit anders was in die verlede nie.

Die oudste bewyse vir boogjag, so tussen 80 en 60 duisend jaar gelede, kom uit Suid Afrika. Ek ondersoek ‘n moontlike verband tussen die evolusie van die menslike brein, soos wat ons dit vandag ken, en komplekse, twee-handige boogjagtegnologie. Om dit te kan doen, kyk ek onder andere na elektro-neurologiese inligting verkry van die breine van moderne boogskutters en die evolusie van die precuneus. Laasgenoemde is ‘n breinarea wat ons vandag toelaat om komplekse twee-handige aktiwiteite uit te voer (soos klavierspeel), en om bewustelik oordeelkundig te werk met bewegende voorwerpe op ‘n afstand (soos motorbestuur).

Onlangse genoomnavorsing laat ons ook toe om neurogenetiese inligting te gebruik om te spekuleer oor verskille tussen Homo sapiens, Neandertal en Dinisovan denkwyses. Binne hierdie konteks, ondersoek ek gene wat betrekking het op ‘aandag’, omdat die vermoë om bewustelik en oordeelkundig aandag te kan gee, krities is vir suksesvolle boogjag – en soveel ander dinge wat ons vandag as vanselfsprekend aanvaar. Vir meer inligting, sien gerus:

www.researchgate.net/publication/383919981_How_ancient_bowhunting_technology_developed_focused_human_attention

YouTube video: youtube.com/watch?v=uQygCvdT-i4

Ons het verlede jaar gedurende Mei ons eerste NHN kamp aangebied. Daar was baie versoeke om dit hierdie jaar weer te doen en ons voldoen graag.

Die beplande tyd en plek is Maandag 5 Mei tot Woensdag 7 Mei by Dinokeng Camp and Leisure (DC&L). Daar sal beide kampeerplek en chalets beskikbaar wees.

Daar is net ses chalets, so dit is belangrik dat diegene wat in chalets wil bly, dit so gou moontlik bespreek. Doen asseblief julle eie besprekings en deposito betalings by DC&L. Noem dat julle saam met NHN kom sodat ons naby aan mekaar geplaas kan word.

Meer inligting oor DC&L en die verblyf kan by dinokengcl.co.za/#Accommodation gevind word.

Die vorige keer was ‘n fees; teken dit sommer nou al in jou dagboek aan!

Rig navrae aan Leon Stander by 0764490631.

Historiese Jesus ondersoek in Suid-Afrika (’n gesprek met Andries van Aarde se bydrae)

In die 19de eeu, samehangend met ’n groeiende historiese bewussyn, het Europese geleerdes die Bybel begin ontleed met die oog op akkurate geskiedskrywing. Een van die uitlopers hiervan was die onderskeid tussen die Jesus van die kerk (en teologie) en die historiese Jesus. Die navorsing oor die historiese Jesus het mettertyd as ’n baie sterk dissipline in sigself ontwikkel, en ’n hoogbloei beleef laat in die 20ste eeu (en nog steeds). In Suid-Afrika het die historiese Jesus nooit eintlik aftrek gekry nie. Redes hiervoor het (waarskynlik) te doen met ’n swak ontwikkelde historiese bewussyn, die groot rol wat heilsgeskiedenis in Afrikaanse teologie speel, die sukses van evangeliese “sieligheid” in populêre godsdiens, asook die hiërargiese gesaghebbendheid wat baie van ons se lewensuitkyk bepaal. Die meeste Suid-Afrikaanse studies oor die historiese Jesus is eintlik net afwysende verslae met die klem op die irrelevansie van sulke ondersoeke. Daar was egter uitsonderings, soos Jesus die sjamaan (Craffert), en Jesus die Joodse rebel (Botha). In die lig van Andries van Aarde se onlangse afsterwe en die massiewe rol wat hy in Suid-Afrikaanse Nuwe Testament wetenskap gespeel het sal ek egter aandag gee aan sy Jesus die weeskind, maar ook lyne trek na sy sieninge in verband met die vroeë kerk en die rol van Paulus in die ontstaan van die Christelike godsdiens.

YouTube video: youtube.com/watch?v=iHjZCnL1iBk

“Invented Afterlives” – vergesogte beloftes oor lewe na die dood in hoofstroom Abrahamiese en ander godsdienste, en die implikasies hierdie ideologiëe vir die moderne wêreld.

In dié lesing gee Prof. Dries Engelbrecht ‘n opsomming van sy boek. Dit bied ’n omvattende oorsig van die godsdienstige konsep van “’n hiernamaals.” Dries beskryf en vergelyk hierin die hiernamaals-ideologieë van die groot kontemporêre godsdienste op die planeet, en sommige historiese godsdienste. Die ontwikkeling van die hiernamaals-ideologieë oor die eeue en binne godsdienste word beskryf, en uitgewys vir die absurditeite wat dit is.

Hierdie godsdienste vermaan die mensdom om hulle kort aardse lewens op só ’n wyse te lei dat hulle ’n goeie lewe na die dood sal kan beleef. Maar is dit ’n redelike manier om ons lewens te leef? Dit leer ook dat die hel die hiernamaals bestemming van die meeste van die mensdom sal wees. Slegs ’n klein aantal mense wat die sogenaamde nou paadjie gevolg het, sal die hemel binnegaan.

Alternatiewelik volg Oosterse godsdienste, wat in hierdie boek bespreek word, insluitend Hindoeïsme, Sikhisme en Boeddhisme, die idee van reïnkarnasie. Hierdie proses begin van laer lewensvorme soos insekte en ander diere, tot ’n paar rondtes in menslike vorm. Alles vorder van ’n lae na ’n hoë sosiale status of kaste en kulmineer in ’n onbaatsugtige en vreedsame toestand genaamd “moksha” of “nirvana”. Laasgenoemde het baie in gemeen met die normale konsep van die ’n hemel.

Meer vrae wat in hierdie boek gevra word, is: Is daar enige oortuigende bewyse vir ’n hiernamaalse lewe? Is dit nie maar net pure fantasieë nie? Is ’n bestaan waarin miljarde mense in die hel brand, ’n etiese aanvaarbare siening oor ’n god en sy uitgesoekte menslike volgelinge? Hoe beïnvloed hierdie ideologieë mense en hulle politiek? Watter soort aktiwiteite sal waarskynlik in die hiernamaals plaasvind, en wat sal byvoorbeeld die doel van seks in die hiernamaals wees (soos voorgehou deur sekere godsdienste). Of sal die hiernamaals slegs bestaan uit lofprysing van ’n godheid? Is dit ’n sinvolle manier van bestaan? As daar geen goeie bewyse vir ’n hiernamaals is nie, maak dit sin om te lewe in die nastrewing daarvan?

Hierdie boek is ’n belangrike kritiek op ’n universele aanspraak van byna elke godsdiens op die planeet. As hiernamaalse ideologieë inderdaad absurd en onwaar is, het dit implikasies vir hoe mense kies om hulle lewens te lei en hoe hulle hul enigste bewoonbare planeet bewaar.

Hierdie boek is ook uniek in die genre van kritiek op godsdiens, deurdat dit beide die Abrahamitiese godsdienste (met hulle hemel-hel-dualiteit) en Oosterse godsdienste (met hulle ideologie van samsara en reïnkarnasie) beoordeel.

Die boek kan bestel word by: https://amzn.to/4hH1OJt of by https://naledi.co.za/product/invented…

YouTube video: youtube.com/watch?v=vAxThRUbsWo

Die Nasionale Gesondheidsversekering (NGV) – heil of onheil?

Prof. Alex van den Heever is verbonde aan die Universiteit van die Witwatersrand. Hy is ‘n ekonoom en sal oor die Nasionale Gesondheidversekering (NHI) praat. Hy is ‘n kenner daaroor en het krities daaroor gereageer in ‘n reeks onderhoude op Marié Hudson se radio-rubliek, “Gesondheid op RSG”. 

Dr Lindie Koorts, ‘n historikus van die Universiteit van Pretoria, se lesing is getiteld: “Noem die kind by die naam.” Dit handel oor die viering van die 100-jarige erkenning van Afrikaans wat vanjaar gevier word. Is daar net een vorm van Afrikaans en het Afrikaans slegs onder die mense uit Europa wat hulle in Suid-Afrika kom vestig het, ontstaan? Waar het hierdie taal sy oorsprong, of moet ons praat van oorspronge? Is Afrikaans ’n kreoolse taal?

YouTube video: youtube.com/watch?v=oUCpZyVtfWA

Die vlugtige aard van idees

Dit gaan oor die kwesbaarheid van kennis en hoe vinnig eeue se inligting van bv. die Biblioteek van Alexandria, of die Huis van Wonders van Bagdad in ‘n ommesientjie uitgewis kan word – en die gevolg van hierdie verlies van die vloei van inligting van een geslag na die ander.  Ek gaan ook ‘n draai deur Gobekli Tepe, Rapa Nui (Easter Island), Germanië, Skandinawië, Egipte en Rome gooi.

YouTube video: www.youtube.com/watch?v=4vhVTgLI82Q

KUNSMATIGE INTELLIGENSIE: VOOR– EN NADELE

Die aanbieding beoog om kortliks en oorsigtelik die tegnologie van Kunsmatige Intelligensie
(KI) te bekyk. Daar sal veral bespiegel word oor die huidige verstaan van korttermyn- en
langtermyn risikos asook voor- en nadele van KI vir die gewone burgers.

Die spreker se gevolgtrekking sal wees dat die direkte korttermyn-nadele, impak en risikos
van KI tans (baie) meer is as die direkte voordele. Die gevolgtrekking sal gemotiveer word deur
die uitsprake van kundiges op die verskillende relevante impakgebiede.

Lesing deur Jan Horn:

’n Kort kennismaking met die Boesmans van die Kalahari

Alle mense op aarde vandag het Boesman-gene in hulle. Hulle was, en is, die oorsprong van ons almal. Gedurende my tyd by die TV-program 50/50 het ek vyf programme oor die Kruiper-clan, die Boesmans van die Kalahari, gemaak. Dit was ’n verrykende belewenis om hulle kultuur, lewenswyse en spiritualiteit te ontdek. Die oorgrote meerderheid godsdienste in die wêreld sentreer om heilige plekke: sinagoges, kerke, moskees, tempels en katedrale. Binne hierdie ruimtes is dit heilig, maar buite is dit sekulêr. [Daar is dus ’n dualiteit: “sacred places” teenoor “secular places”]. In die Boesmans se kosmologie bestaan daar nie heilige plekke nie, maar is daar heilige omgewings (“sacred spaces”) en dit is onbegrens. Dit kan ’n mens raaksien in hulle rotskuns. Op Sondag 23 November gaan ek hierdie “sacred spaces” illustreer deur videogrepe te vertoon van hulle leefwyse, hulle musiek, humor en aspekte van hulle lewe wat ons tegnologies gedrewe wêreld verloor het.

Dis ons laaste byeenkoms en daar sal weer ’n bring-en-deel ete na die tyd wees. Kom kuier gerus vir oulaas saam met ons.