Die NHN vergader weer op Sondag 18 Augustus om 10:00 by Retire@Midstream se rolbalklub. Prof Pieter Craffert sal by die geleentheid praat oor die onderwerp “Hoe oop is die NHN vir oop gesprek?” Hieroor skryf hy soos volg:
Sakkie se e-pos aan my was kort en kragtig: “Sien jy kans om op 18 Augustus jou indrukke van die afgelope 20 jaar te gee?” Hierdie is dus nie ’n lesing oor ’n spesifieke onderwerp nie, maar my indrukke. Ek gaan dit doen rondom die tema van “oop gesprek.” Volgens die reglement wat ons in 2004 aanvaar het, was die doelstelling van die NHN “oop religieuse gesprek.” Op die webblad word dit vandag bemark as “Netwerk vir oop gesprek oor menswees” en die temas sluit in wetenskap, mens en kosmos, diversiteit, realiteit en die brein.
Ek sal my indrukke van die NHN struktureer aan die hand van drie aspekte wat die karakter van oop gesprek rig: die “dat,” die “wat” en die “hoe” van oop gesprek. Die “dat” van oop gesprek dui op vryheid van spraak, oftewel, die reg om oor sake te praat. Die “wat” van oop gesprek het te doen met taboe-onderwerpe (oftewel, die moed van jou oortuiging om oor kontensieuse sake te praat). Die “hoe” van oop gesprek is die moeilikste en handel oor die kuns van kritiese dialoog te midde van onoorbrugbare verskille. Wanneer is ’n kritiese gesprek werklik “oop”? Dus: Hoe oop is die NHN vir oop gesprek?